№77 МЕКТЕП-ГИМНАЗИЯСЫНДА МҰҚАҒАЛИ ӘЛЕМІН ҰЛЫҚТАҒАН БАЙҚАУ ӨТТІ
2019 жылдың 16 ақпан күні №77 мектеп-гимназиясында қалалық деңгейде «Мәңгілік жыр – ғұмыр» атты ақиық ақын Мұқағали Мақатаевтың шығармашылығына арналған әдеби-танымдық байқау жоғары деңгейде ұйымдастырылып, мазмұнды өтті. Рухани-мәдени шараның басты мақсаты – жас ұрпақтың қазақ поэзиясына деген сүйіспеншілігін арттыру, оқушылардың шығармашылық қабілетін шыңдау және Мұқағали мұрасын кеңінен насихаттау болды.
Байқау үш бағыт бойынша өткізілді.
Алғашқы бағытта қатысушылар ақынның бір шығармасы негізінде сахналық қойылым ұсынып, көркем сөз бен актерлік шеберлікті ұштастырды. Екінші «Жырлайды жүрек» бағыты бойынша оқушылар Мұқағалиға арнаған өздерінің төл шығармаларын оқып, ақын рухымен сырласқандай әсер қалдырды. Ал үшінші «Өлеңнен өрілген ой» бағыты аясында 8-сынып оқушылары арасында эссе жазу байқауы ұйымдастырылып, оқушылардың ой тереңдігі мен тіл мәдениеті сарапқа салынды.
Аталған байқауға Астана қаласындағы білім беру ұйымдарының оқушылары белсенді түрде қатысып, әр бағытта өзара шеберлік пен білім бәсекесін көрсетті. Қазылар алқасының құрамында өнер мен сөз саласының білікті мамандары болды. Атап айтқанда, Төкенұлы Берікқали – актер, режиссер, Серікзат Дүйсенқазы – ақын-айтыскер, Светлана Әбдешқызы – тіл жанашыры, сондай-ақ Астана қаласы Руханият және тілдерді дамыту орталығының аға оқытушысы Бекжанов Бауыржан байқауға әділ бағасын берді.
Қазылар алқасы қатысушылардың шығармашылық ізденісін, сахналық мәдениетін, көркемдік деңгейі мен мазмұн тереңдігін ескере отырып, әр бағыт бойынша жеңімпаздар мен жүлдегерлерді анықтады. Байқау қорытындысында оқушылармен бірге жетекшілік еткен мұғалімдер де дипломдармен және алғыс хаттармен марапатталды.
Байқау соңында қатысушылар мен қонақтар іс-шараның жоғары деңгейде, мазмұнды әрі тағылымды ұйымдастырылғанын атап өтіп, №77 мектеп-гимназиясы ұжымына өз ризашылықтарын білдірді. Мұқағали поэзиясы арқылы жас ұрпақтың жүрегіне рухани сәуле түсірген бұл байқау мектеп өміріндегі мәнді мәдени шаралардың біріне айналды.